అదోలా వుంటాయి
ముందురోజు
హడావిడి మతలబులన్నీ
ముడి వీడి
కళ్ళ మీద మత్తుగా
వాలుతుంటాయి,
యుద్ధానంతరం సాగే
విరామంలా తోస్తూనే
మరో మహాసంగ్రామానికి
సిద్ధమయే భ్రమలో
అదోలా వుంటాయి
ఆదివారం మధ్యాహ్నాలు!
నలుపూ తెలుపుల్లో
నలిగిన ఛాయాచిత్రపు లోతుల్ని
గ్రహించలేనంత తీరిగ్గానూ,
సగంలో ఆపబడిన పుస్తకంలా
సుదీర్ఘంగానూ సాగుతుంటాయి,
గుమ్మం ముందు
ఎండ పొడలో అదోలా
ఆదివారం మధ్యాహ్నాలు!
ఆకులు కదలవు
గాలి వీచదు
సందేహాత్మక నిశ్చలత్వాన్ని
ఆపాదించుకుని
ఆరుబయట అంతా
అదో మాదిరిగా వుంటుంది
కనిపించని వేడిని వెంటేసుకుని
సమాధానపడని
ఓ నగ్నజ్ఞాపకంలా
గుండెని సర్రున కోస్తూ,
స్రవిస్తున్నదేమిటో
భారమో...భావమో
తెలీకుండా!
నిజంగానే....
అదోలా వుంటాయి
ఆదివారం మధ్యాహ్నాలు!
-David
