క్షణమొక యుగమై సాగుతున్నది
మనసు మారాము చేస్తున్నది
నిదుర రాని నాకనులు నిన్నేకోరుతున్నవి!
నెలవంక నన్ను ప్రశ్నిస్తున్నది
వెన్నెల అంతా ఆవిరై పోతున్నది
ఎదురు చూసి నాకనులు కాయలు కాస్తున్నవి!
నా మనసు నీ చెంతన ఉన్నది
నీ మనసు నా మాట వినకున్నది
మదిన అలజడులు సుడులు తిరుగుతున్నవి!
ఎదన దుఃఖం ఎగసి పడుతున్నది
తలపులతో తనువు బరువౌతున్నది
హృదయపు సవ్వడులు తక్కువై నిట్టూర్పులు ఎక్కువౌతున్నవి!
ప్రేమ ఓటమిని అంగీకరించనన్నది
మరణం విజయ దరహాసం చేస్తున్నది
పెదవి దాటని పదాలు నిన్ను కడసారి చూడాలంటున్నవి!
స్వప్నం కూడా నిన్ను కానలేదన్నది
నా జీవితం మైనంలా కరుగుతున్నది
నిరాశల నిశిరాత్రిలో ఆశలు మినుకుపురుగులై మెరుస్తున్నవి!
