అసలిది నా మనసేనా .........
కాలపు ప్రవాహం లో ఈదులాడి అలిసేనా ?
చిగురుటాకుపై మెరిసే చిన్ని మంచు బిందువుని చూసి మురిసిన మనసేనా ,
చందమామ లో విరిసే వెన్నెల పువ్వుల్ని కోసి కోసి అలసిన మనసేనా!
కొమ్మల్లో కూసే కోయిల కోసం ఆమనల్లే ఎదురుచూసిన మనసేనా ,
మబ్బుల్లో విరిసే హరివిల్లు కోసం ఆకాశమంతా వెదుకులాడిన మనసేనా !
చిన్ని పాపలతో ఆడుతూ ఆనందపు అంచులు తాకిన మనసేనా,
చిన్ని సంతోషపు జడివానకే పురివిప్పి నాట్యమాడిన మనసేనా!
పారిజాత పువ్వుల్ని ఏరుకుని పరవశించిన మనసేనా,
చిరుజల్లులో తడిసిన మట్టి వాసనకి పులకరించిన మనసేనా!
ఎందుకిలా పాషాణమల్లే మారిపోతోంది ?
స్పందనలు మరచి మౌనమై మిగిలిపోతోంది !
ఎంత పెద్ద ఆనందపు అల తాకినా కదలక పడి ఉంటోంది,
ఇంత సొగసైన జీవన ప్రవాహం లో కలవను పొమ్మంటోంది!!!!
